Соғыс жағдайында әрекет етуге қабілетті жауынгерлік бөлімшелер құрылады – министр

Нұр-Сұлтанда өткен қорғаныс ведомствосының алқа отырысында президент – Қарулы күштердің Жоғарғы Бас қолбасшысы Қасым-Жомарт Тоқаев берген тапсырмаларды орындау аясында есептік кезеңдегі қызметтің қорытындысы шығарылды. Бұл туралы  Қорғаныс министрлігінің баспасөз қызметі хабарлады.

Қорғаныс министрі генерал-полковник Руслан Жақсылықовтың төрағалығымен өткен алқа отырысына әскер түрлерінің бас қолбасшылары, өңірлік қолбасшылықтар әскерлерінің, әскер тектерінің қолбасшылары, әскери бөлімдер мен  құрамалардың командирлері қатысты.

Министр соғыс жағдайында да, дағдарыс ахуалында да әрекет етуге қабілетті жауынгерлік бөлімшелер құрылып жатқанын хабарлады.

– Мемлекет басшысы Қарулы күштерді қайта форматтау, олардың жауынгерлік әзірлігі мен жарақтандырылуын арттыру жөнінде тапсырмалар берді. Осылайша, соғыс жағдайында да, дағдарыс ахуалында да әрекет етуге қабілетті жауынгерлік бөлімшелер құрылуда, – деді генерал-полковник Руслан Жақсылықов.