Соғыс тоқтамаса, әлемде аштық басталуы мүмкін – экономист

Экономист Мақсат Халық сұхбат беріп, әлемдегі экономикалық жағдай және Украина мен Ресей арасындағы соғыстың әсері туралы айтты.

«БҰҰ бас хатшысы Антониу Гуттериш: «Әлемде аштық болады» деді. Бұл нәубет Қазақстанға қашан жетеді?» деп сұрады журналист.

– Мүмкін. Әсіресе кедей мемлекеттерге, төлем қабілеті төмен елдерге әсері болады. Көріп отырғанымыздай энергетика ресурстары, оның ішінде мұнайдың бағасы қымбаттады. Мұның бәрі жанама түрде егістік өнімдерінің қымбаттауына алып келеді. Тиісінше кедей мемлекеттер қиындыққа тап болады. Қазақстанда қазір мұндай қауіп жоқ. Өйткені біз өзімізді 95 пайыз ұнмен қамтамасыз етіп отырмыз. Біздің елде ашаршылық орын алады дегенге негіз жоқ. Дегенмен тауарлар бойынша мәселелерді қарау керек, - деді экономист.

Мақсат Халық теңгенің жағдайы жайлы айтып, «теңге валюта ретінде жойылып кетуі мүмкін бе?» деген сұраққа жауап берді.

– Жойылып кетеді деуге негіз жоқ. Көп жерде «теңге ауысып кетеді, сол үшін несие алып қалыңдар» деген әңгіме айтылып жүр. Кез келген елде деноминация деген саясат бар. Бұл саясатты бір кездері Германия, соңғы жылдары Түркия жүргізген. Біз теңгенің қатты құнсыздану дәрежесіне жеткен жоқпыз. Сарапшылар ақшаның соңындағы екі нөлді алып тастайық деген пікірлер айтып жүр. Бірақ мұның салдары бар. Олай болғанда бүкіл дүниеден екі нөлді алып тастауымыз керек болады. Біз бұған психологиялық түрде дайынбыз ба? Мемлекетімізде белгілі бір дәрежеде ұлттық қор бар. Ұлттық қорда 54 млрд доллар көлемінде қаражат бар, - деп жауап беру Мақсат Халық.