Соңғы 11 жылда Еуропалық ғарыш агенттігі алғаш рет ғарышкерлерді қабылдайды

Еуропалық ғарыш агенттігі (ESA) ғарышкерлерді жұмысқа қабылдау туралы хабарлама жариялады. Бұл туралы агенттіктің ресми сайтында жазылды.

«Еуропалық ғарыш агенттігі соңғы 11 жылда алғаш рет жаңа ғарышкерлер іздейді. Бұл шақырылушылар Еуропа ғарышты игерудің жаңа дәуіріне қадам басқан кезде қазіргі ESA ғарышкерлерімен бірге жұмыс істейтін болады», - делінген хабарламада.

ESA әйелдерді де өтініш беруге шақырады.

«Біз өз қатарымызда гендерлік теңдікті арттыруға міндеттіміз», - деп атап өтті агенттік.

Агенттік, сонымен қатар, физикалық мүмкіндіктері шектеулі ғарышкерлерге бос орындар болу ықтималдығын жоққа шығармады.

Бос жұмыс орындарына өтініштер қабылдау 2021 жылдың 31 наурызынан 28 мамырына дейін ашық болады. Осыдан кейін алты сатылы іріктеу процесі басталады, ол 2022 жылдың қазан айында аяқталады деп күтілуде.