«SMALL» және «METRO» ірі сауда желілеріне іс қозғалды

«SMALL» және «METRO» сауда желілері тауар бағасын ұлғайтқаны үшін жауапкершілікке тартылды.

Бұл туралы министрліктің сауда және интеграция комитеті хабарлады.

«Тауар бағасын ұлғайтқаны үшін Алматыда республика бойынша бірнеше филиалдары бар «SMALL» және «METRO» ірі сауда желілері, сондай-ақ мегаполистегі ең ірі премиум-класстағы «Есентай гурмет» азық-түлік дүкені әкімшілік жауапкершілікке тартылды» деп хабарлайды баспасөз қызметі. 

Белгілі болғандай, жарты жылда Сауда және тұтынушылардың құқықтарын қорғау комитетінің аумақтық департаменттері 2357 әкімшілік іс қозғаған.

Олардың қорытындысы бойынша әкімшілік жауапкершілікке тарту туралы 2228 қаулы шығарылды, оның ішінде 381-і айыппұл түрінде және 1847-і бірінші рет жасалған бұзушылықтар бойынша ескерту түрінде.

«Өткен жылмен салыстырғанда биылғы жылдың 6 айындағы мемлекеттік бақылау нәтижелері көрсеткіші екі еседен астамға өсті» делінген хабарламада.

Ең көп бұзушылықтар ӘҚБтК-нің екі бабы бойынша анықталды – әлеуметтік маңызы бар азық-түлік тауарларының (ӘҚБтК) тауарлық үстемеақыны асыра пайдалануы (ӘҚБтК-нің 204-4-бабы) және әртүрлі бағаларды пайдалану немесе баға белгілерінің болмауы (ӘҚБтК-нің 193-бабының 4 және 5-бөлігі).