Смайылов шахтадағы апат туралы: Биыл жазда компания басшылығына айттым

Үкімет басшысы Әлихан Смайылов «АрселорМиттал Теміртау» АҚ КД «Ленин атындағы» шахтасындағы апатқа қатысты жазба жариялады.

– 3 қарашада «АрселорМиттал Теміртау» АҚ КД «Ленин атындағы» шахтасында апат орын алды. Соңғы мәліметтерге сәйкес бес кенші қайтыс болды. Осыған байланысты менің өкіміммен ҚР Төтенше жағдайлар министрі Юрий Ильин жетекшілік ететін Үкіметтік комиссия құрылды. Оның құрамына уәкілетті министрліктердің, жергілікті атқарушы органдардың және кәсіподақ ұйымдарының өкілдері кірді, – деп жазды Смайылов.

Үкімет басшысы қаза тапқандардың отбасына көңіл айтып, биыл жазда компания басшылығына кеншілер үшін қауіпсіз еңбек жағдайларын жасауды ескерткенін айтты.

– Биыл жазда «АрселорМиттал Теміртау» АҚ-ға барған кезімде мен компания басшылығына кеншілер үшін қауіпсіз еңбек жағдайларын жасау, өндірісті жаңғыртуға инвестициялар бөлу жөнінде кешенді шаралар қабылдау қажет екенін айтқан болатынмын. Үкіметтік комиссия алдына апат себептерін объективті тексеру, шұғыл мәселелерді шешу, сондай-ақ қаза тапқандар мен зардап шеккендердің отбасыларына жан-жақты көмек көрсету бойынша міндеттер қойылды. Қаза болғандардың туыстары мен жақындарына қайғырып көңіл айтамын, – дейді ол.