Смайылов «ЛУКОЙЛ» президенті Алекперовпен кездесті

ҚР премьер-министрі Әлихан Смайылов «ЛУКОЙЛ» ЖАҚ президенті Вагит Алекперовпен кездесу өткізді. Тараптар геологиялық барлау жүргізу және мұнай кен орындарын игеру, сондай-ақ бұрғылау қондырғыларын жаңғырту, логистика және салық салу бойынша бірлескен жобаларды іске асыру мәселелерін талқылады. Бұл туралы ҚР Үкіметінің баспасөз қызметі хабарлады.

Әлихан Смайылов Қазақстан Үкіметі бірлескен жұмысты жалғастыруға және ынтымақтастықтың жаңа ықтимал бағыттарын айқындауға дайын екенін атап өтті.

Өз кезегінде «ЛУКОЙЛ» ЖАҚ басшысы компания Қазақстан аумағында инвестицияларды одан әрі кеңейтуге және жаңа жобаларды әзірлеуге мүдделі екенін айтты.

«ЛУКОЙЛ» ЖАҚ – әлемдік мұнайдың 2%-дан астамын өндіретін ресейлік мұнай-газ компаниясы. Компания Қазақстанда өз қызметін 1995 жылы бастады, бүгінгі күні ол мұнай және газ өндіру, жағармай материалдарын өндіру жөніндегі бірқатар жобаларға, сондай-ақ Каспий құбыр консорциумына қатысады. 1995 жылдан бері компанияның ел экономикасына құйған инвестициясы $10 млрд доллардан асты.