Смайылов «АрселорМиттал Теміртау» кәсіпорнына тапсырма берді

Қарағанды облысына жұмыс сапары кезінде премьер-министр Әлихан Смайылов Теміртау қаласының өнеркәсіп және әлеуметтік нысандарын аралады. Бұл туралы премьер-министрдің баспасөз қызметі хабарлады.

Смайылов «АрселорМиттал Теміртау» АҚ-ның 3-домна пешінің жұмысымен танысты, сондай-ақ облыс және кәсіпорын басшылығымен өнеркәсіп қауіпсіздігін қамтамасыз ету мәселелерін талқылады.

Әлихан Смайылов металлургия өндірістің қауіптілігі аса жоғары саласы екенін айтты.

– Жыл сайын өндірісте 10-12 адам мерт болады. Біз бұл жағдайға көне алмаймыз. Жабдықтардың әбден тозығы жеткен, жаңғыртуға салынатын инвестициялар деңгейі басқа кәсіпорындармен салыстырғанда 2-3 есе төмен. Мұны түзету керек. Инвестиция көлемін кезең-кезеңмен арттырып, ең алдымен, қызметкерлердің қауіпсіздігін қамтамасыз ету керек, — деді Смайылов компания басшылығына. 

Үкімет басшысы экологиялық қауіпсіздікті қамтамасыз ету мәселелеріне назар аударды.

– Күн тәрбіндегі экологиялық мәселелер өткір тұр. Мемлекет басшысы біздің алдымызға тиісті міндеттер қойып отыр. Сондықтан бұл мәселе бойынша бірлесіп жұмыс істеуіміз керек, – деді ол.

Сондай-ақ, ол кәсіпорын басшылығын өндірістегі жазатайым оқиғалардың алдын алу және экологиялық міндеттемелерді сақтау бойынша пәрменді шаралар әзірлеуге шақырды.