СҚО тұрғындары қаздардың құс тұмауынан қырылғанын дәлелдей алмай жүр

Солтүстік Қазақстан облысында бірнеше ауылда үй құстары жаппай қырылып жатыр. Облыстық ветеринардық басқарма оны пастереллёзбен байланыстырған, деп хабарлайды Orda.kz.

Алайда тұрғындар бұл қорытындыға келіспей, тәуелсіз сараптама жасатқан. Оған сәйкес құстар H5N1 штамын жұқтырғаны анықталған.

Тұрғындар карантин жарияланып, мемлекет өтемақы төлеуі керек деп есептейді. Олардың сөзінше, құстардың қырылуына құс тұмауы себеп болғанына еш күмән жоқ.

«Алматыдағы микробиология және вирусология ғылыми институтында талдау жүргіздік. Бұл — мемлекеттік аккредитациясы бар ұйым. Олар жоғары патогенді H5N1 вирусын растады. Алайда жергілікті органдар бұл нәтижені қабылдамай отыр. Облыс әкімінің орынбасары Марат Тасмағамбетовпен кездескенде ол 50 пайыз өтемақы төленетінін айтты. Бірақ оны растайтын құжат бермеді. Пастереллёз үшін өтемақы қарастырылмаған. Мұны заң бұзу деп санаймын», – дейді Шаховское ауылының тұрғыны Жанат Ғаббасов.

Қызылжар ауданының Шаховское ауылындағы шығын айрықша көп. Әдемі Қалмұрзинова 7 мың қаз өсірген. Енді кәсіпті дамытамын деп алған несиесін қалай өтейтінін білмей отыр.

«7 мың қаз түгелге жуық қырылып қалды. Мемлекет шағымымызға көңіл бөлмей отыр. Ауру облысқа таралып барады. Өз қаражатымыздан 35 млн теңге жұмсадық. Бұл вирустың адамға да жұғу қаупі бар. 100 пайыз өтемақы талап етеміз», – дейді ол.

Кәсіпкерлер жаз бойғы еңбегі мен шығыны үшін өтемақы берілмесе, Президентке хат жазамыз дейді.

Қызылжар аудандық ветеринарлық станциясының директоры Ербол Багемов жағдайға қатысты пікір білдірді.

«Қызылжар ауданындағы мал дәрігерлері бірнеше рет сынама алды. Олар облыстық зертханаға, Астанадағы зертханаға және Ұлттық референттік зертханаға жіберілді. Қорытындыда пастереллёз анықталды. Бұл – аса қауіпті инфекция, сондықтан тек мемлекеттік аккредитациядан өткен зертханалардың нәтижелері қабылданады», – деді ол.

Бұған дейін Бугровое ауылында да құс қырылған. Аудан әкімдігінің дерегінше, екі елді мекенде 11 мыңнан астам қаз шығын болған.

Автор: Ханшайым Байбол