СҚО прокурорлары көлікті ұзақ уақыт қыздыруға салынған айыппұлды алып тастады

Солтүстік Қазақстан облысының прокуратурасы Петропавл тұрғынына көлікті бес минуттан астам қыздырғаны үшін салынған әкімшілік айыппұлдың күшін жойды, деп хабарлайды Orda.kz.

Полиция жүргізушінің үстінен көлік қою ережесін бұзды деген айыппен хаттама толтырды. Алайда, іс қозғала келе, прокуратура полиция тарапынан өрескел процессуалдық қателіктерді анықтады.

Хаттама жасаған полицей заң бұзушылықты дәлелдей алмады. Сонымен қатар, хаттаманың өзі де заңсыз жасалғаны белгілі болды. Нәтижесінде прокурорлар полицейдің әрекетін заңсыз деп таныды. Іс тоқтатылып, айыппұлдың күші жойылды.

Экология және табиғи ресурстар министрі Ерлан Нысанбаев көлікті бес минуттан артық қыздырғаны үшін айыппұл салуды қолдағанын бұған дейін жазған болатынбыз. Баспасөз мәслихатында ол бұл ереженің экология үшін маңызды екенін айтты. Оның айтуынша, солтүстік облыстардың өзінде көлікті қыздырып, жолға шығуға бес минут жеткілікті екен.