СҚО-дағы қытайлық кәсіпорында жойқын жарылыс болды

Солтүстік Қазақстан облысының Тайынша ауданына қарасты Ильичевка ауылында қытайлық «Айцзюй» корпорациясына тиесілі агроөнеркәсіптік кәсіпорында жарылыс болды, деп хабарлайды Orda.kz.

Белгілі болған деректерге қарасақ, жанармай бекетінің құбыршегі (шланг) үзіліп, соның салдарынан кәсіпорындағы екі жинақтағыш жарылып, артынша Volvo маркалы газ тасымалдаушы көлік отқа оранған. Бұл туралы СҚО полиция департаменті хабарлады.

Оқиға салдарынан тоғыз адам зардап шегіп, олардың сегізі ауруханаға жеткізілді. Отқа оранғандардың арасында түрлі дәрежедегі күйік пен жарақат алғандар бар. Зардап шеккендердің арасында Көкшетаудан газ әкелген жұмысшылар, сондай-ақ апат орнына көмекке келген құтқарушылар да болды.

еGov порталындағы мәліметке қарасақ, жарылыс болған нысан – «Тайынша май» ЖШС май өнімдерін өндірумен айналысады. Компанияның иесі – агроөнеркәсіп және халықаралық логистика саласында жұмыс істейтін Қытайдың «Айцзюй» корпорациясы.

Айта кетейік, «Айцзюй» компаниясының негізгі логистикалық торабы – Қытайдың Сиань қаласындағы порт. Бұл жерден Қазақстанда өндірілген май, ұн және басқа да тауарлар Орта Азия мен Еуропа елдеріне теміржол арқылы жөнелтіледі.