СҚО-да сауда желісі басшылығынан 50 миллион теңге бопсалаған «блогерлер» ұсталды

Сауда желілерінің бірінің директоры Солтүстік Қазақстан полиция департаменті ұйымдасқан қылмысқа қарсы күрес басқармасы қызметкерлеріне шағымданды. Ол петропавлдық «блогерлердің» өзінен 50 миллион теңге бопсалағанын айтты, деп хабарлайды Orda.kz.

Кәсіпкердің арызына жауап берген полицейлер бопсалаушы – 33 және 34 жастағы ер адамдарды ұстады. Олар жергілікті ортада тұтынушыларды қорғау жайымен танымал екен. Сонымен бірге, полиция баспасөз қызметінің хабарлауынша, «блогерлер» бірнеше рет ақысын төлемей, азық-түлік өнімдерін алып кеткен.

«Олар тұтынушы құқықтарын қорғау ұранымен 2022 жылдың басынан бері олар Петропавлдағы сауда орындарында тұрақты түрде «рейд» жүргізіп келеді. Блогер атын жамылғандар сауда желісі қызметкерлерінің қатысуымен арандатушылық бейнероликтер түсіріп, полиция шақырылған кезде жанжалды жағдай туғызған. Арандатушылық пен қақтығыс кезінде олар жарамдылық мерзімі өтіп кетті деген өнімдерді сату фактілеріне сүйенген» деп хабарлады мекеме.

Күдіктілер «рейдтермен» қатар, «бизнесті жоспардан тыс тексерудің» арқасында сауда орындарында анықталған бұзушылықтар туралы мемлекеттік органдарға шағым жолдап отырған.

«Қыркүйек айының басында жастар осындай әрекеттерімен қорқытып, сауда желісінің аймақтық директорынан бопсалау арқылы 50 миллион теңге көлемінде ақша талап ете бастаған. Алайда оларды Солтүстік Қазақстан облыстық полиция департаментінің Ұйымдасқан қылмыспен күрес басқармасы қызметкерлері бопсаланған 5 миллион теңгенің бір бөлігін беру кезінде ұстады» деп хабарлады СҚО  полиция департаментінің баспасөз қызметі.

Оларға қатысты ҚР ҚК-нің 94 бабы 2 бөлігінің 2 тармағы «Бопсалау» бойынша жедел-тінту шаралары мен  сотқа дейінгі тергеу амалдары жүргізілуде.

Бұған дейін Орал қаласының төрт тұрғыны кәсіпкерлерден жүйелі түрде ақша бопсалады деген күдікке ілінген. Олар қомақты сома мен қымбат смартфондар бопсалаған. Кәсіпкерлер оларға барлығы 10 миллион теңгеге жуық ақша берген.