СҚО-да лауазымды тұлғалар су тасқынына дайындық жұмыстарын ұйымдастырмаған

Төтенше жағдайлардың алдын алу бойынша заңдылықтың жай-күйін талдау кезінде "Азаматтық қорғау туралы" заң талаптарының өрескел бұзылғандығы анықталды.

Айыртау ауданы әкімдігінің лауазымды тұлғалары тасқын су басатын елді мекендерден қар шығару жұмыстарын ұйымдастырмаған.

Заң талаптарын бұза отыра, бұл ауданда жауапты тұлғалар облыстық және аудандық маңызы бар жолдардағы су ағатын құбырларды тазалау жұмыстарын жүргізбеген.

Осындай бұзушылықтар Ғабит Мүсірепов, Шал ақын, Есіл аудандарында анықталған.

Тимирязев ауданында заң талаптарын бұзып, инженерлік техника мен инертті материалды алуға шарт жасалмаған.

Сонымен бірге Мәмлүт, Ғабит Мүсірепов, Шоқан Уәлиханов аудандарының жергілікті атқарушы органдардың лауазымды тұлғалары қорғаныш топырақ үйіндісін нығайту және су ағатын құбырларды орнату бөлігінде 2024 жылғы су тасқынына дайындық бойынша инженерлік жұмыстар жоспарының іс-шараларын орындамаған.

Қадағалау органы шаралары бойынша жергілікті атқарушы органдар бұзушылықтарды жою бойынша жұмыс жүргізіп жатыр.

Жүргізілген талдау нәтижелері 5 наурызда облыс прокуроры Қ.Әбдіхановтың төрағалығымен ведомствоаралық кеңесте талқыланып, атқарылып жатқан жұмыстар туралы жауапты лауазымды тұлғалар тыңдалды.

Отырыс нәтижесінде су тасқынының қауіпсіз өтуіне және төтенше жағдайдың алдын алуға бағытталған кешенді жұмыстарды жүргізу туралы бірлескен шешім қабылданды.