СҚО-да элеваторда жұмыс істеген 34 жастағы әйелді қамбадағы астық басып қалып, қаза тапты

Солтүстік Қазақстан облысында элеватор қызметкері астық қоймасына құлап, жиналған астықтың астында қалып, қаза тапты, деп хабарлайды Orda.kz.

Қайғылы жағдай 19 қараша күні кешкі уақытта болған. Кәсіпорында жүк тасымалдаушы болып жұмыс істеген әйел 30 метр биіктіктен астық сақтайтын қоймаға құлап кеткен. Оқиға орнына кәсіпорын қызметкерлері дереу құтқарушыларды шақырған.

Әйел табылған кезде тіршілік белгілері байқалмаған. Жедел жәрдем оның астыққа тұншығып көз жұмғанын анықтады. Бұл ақпаратты облыстық полиция департаментінің баспасөз қызметі растады.

«19 қараша күні СҚО Ақжар ауданындағы ауыл шаруашылығы кәсіпорны аумағында астық қоймасына құлап 34 жастағы жұмысшы әйел қаза тапты. Еңбекті қорғау талаптарын бұзу дерегі бойынша қылмыстық іс қозғалды, тергеу жүргізіліп жатыр»,  деп түсіндірді СҚО ПД.