СҚО-да балалар уланды

14 маусымда СҚО-дағы Надежка ауылында дүкеннен тамақ алып жегеннен кейін бүкіл отбасы уланды.

Үш және алты жастағы екі бала қайтыс болды. Ана мен тағы бір бала ауруханада.

СҚО Денсаулық сақтау басқармасы кешкі асқа шұжық, пицца және тұшпара жеген балалардың өліміне токсикалық тамақ инфекциясы, жұқпалы-токсикалық шок, мидың ісінуі себеп болғанын айтты.

Редакцияның сауалына СҚО полиция департаменті нақты себебін атады.

"Сотқа дейінгі тергеу аясында бірқатар сараптама жүргізілді, нәтижесі бойынша балалардың өліміне нитриттен жедел улану себеп болған. Қазіргі уақытта істің барлық мән – жайларын жан-жақты, толық және объективті зерттеуге бағытталған сотқа дейінгі тергеу жалғасуда" деп хабарлады ведомство.

Қазіргі уақытта қылмыстық істі тергеп-тексеру барысы туралы өзге де мәліметтер жария етуге жатпайды.