СҚО-да аудан әкімінің орынбасары ұсталды

Солтүстік Қазақстан облысы Тайыншы ауданы әкімінің экономика, құрылыс және пайдалану мәселелері жөніндегі орынбасары Еркебұлан Дүйсембин пара алғаны үшін тергеуге алынды.

Бұл туралы Антикор хабарлайды.

«Сыбайлас жемқорлыққа қарсы қызметтің Солтүстік Қазақстан облысы бойынша департаменті облыс аудандарының бірінің әкім орынбасары мен бөлім басшысына қатысты сотқа дейінгі тергеу жүргізуде. Лауазымды тұлғалар аудандық маңызы бар автожолдарды ағымдағы жөндеу бойынша орындалған жұмыстар актілеріне кедергісіз қол қойғаны және жалпы қамқорлығы үшін кәсіпкерлік субъектісінен 10 млн теңге көлемінде пара алды деп күдіктелуде. Тергеу сотының санкциясымен «қамауда ұстау» түріндегі бұлтартпау шарасы таңдалды. Тергеу жалғасуда» деп хабарлады Сыбайлас жемқорлыққа қарсы қызмет.

ҚазТАГ хабарлауынша, ұсталған әкімнің орынбасары - Дүйсембин.