«СК-Фармацияның» экс-басшысы Шәріп ақталмайтын болды

Сот СК-Фармацияның бұрынғы басшысы Берік Шәріптің ақтау үкімін өзгертті.

Бұл туралы Orda.kz хабарлады.

– Шәріп қызметтік міндеттерін қызметтің мүддесіне қайшы қолданғаны анықталды. Бірінші сатыдағы соттың үкімі жаңа айыптау үкімімен жойылды, ол ҚР Қылмыстық кодексінің 361-бабы бойынша сотталды.

Шәріп 3 жыл 6 айға бас бостандығынан айрылды.

Еске салсақ, тергеу кезінде Шәріп Inkar компаниясымен Қытайдан 2 млн қорғаныш костюмін жеткізуге келісім жасасқан. Бірақ ЖШС-да қажетті рұқсаты болмаған. Ол компанияның техникалық сипаттамасын заңсыз өзгертіп, көзілдірік, маска, қолғапты жиынтықтан алып тастаған. Келісім бойынша жеткізілуі тиіс костюмдер Қазақстанға мүлдем келмеген. Ол алған 4,1 млрд теңгесін несиені өтеу үшін пайдаланған. Демек, «басқа мақсатта» қолданған.

Кейін Шәріп қажетті қорғаныш костюмдерін тек уақытылы жеткізіп үлгермеді делінген. Салдарынан, 2020 жылы сәуір-мамыр айында 2 мыңнан астам дәрігер ауру жұқтырған. Бірақ судья Қанат Дүйсембиев сотталушының кінәсі дәлелденбеген деген қорытындыға келген.