Сіздерге қан керек пе, әлде адамның басы керек пе? – Бақтияр Артаев

2004 жылы Афинада өткен Олимпиада ойындарының чемпионы, Вэл Баркер Кубогының иегері, Қазақстан Бокс федерациясының вице-президенті, Қазақстанның бокстан мемлекеттік жаттықтырушысы Бақтияр Артаев Олимпиада ойындарындағы сәтсіздіктер туралы айтты. Журналист Нартай Аралбайұлы спортқа бөлінген қыруар ақша, жемқорлық, жарыстарға тек тамыр-таныс арқылы апару туралы түрлі сұрақтар қойды.

Бұл туралы Orda.kz хабарлайды.

– Сіз «мүмкін дайындық өтіп кеткен шығар, мүмкін шаршап келген шығар» дедіңіз. Осының бәріне жауапты адамдар бар ғой. Физиотерпаевт, массаж істеуші, жаттықтырушы, бас жаттықтырушы. Солар қайда, орнынан алайық.

– Сіздер неге асыға бересіздер? Мен түсінбей отырмын, сіздерге қан керек пе, әлде адамның басы керек пе? Асықпасаңыздаршы. Бұл спорт, асығамыз деп күйіп отырмыз. Сіздер білмейсіздер ғой, біз жұмыс істеп жатырмыз. Психологиялық қысым – қазақтардың сабырсыздығы. Бізде өзімізді көре алмайтын жаман қылық бар, - деді Артаев.

– Азия чемпионатына барсақ әділетсіздік, анда барсақ тағы әділетсіздік болады. Біз бокста сонша бейшарамыз ба?

– Біз бейшара емеспіз, кең байтақ еліміз бар. Әр сөзге жабысатын қазағыңнан айналасың кей кезде. Ашығын айту керек, бізде жүйелі жұмыс жасалмаған. Тимур Құлыбаев кеткен кезде қаржы бөлу мәселесі тоқтады. Биылғы жылы бокс федерациясына мемлекеттен бір тиын қаржы бөлінген жоқ, - деді Қазақстан Бокс федерациясының вице-президенті.