Сирия бойынша кездесу 24-25 қаңтарда Астанада өтеді

24-25 қаңтарда Астанада Астана процесі аясында Сирия бойынша халықаралық кездесу өтеді, деп хабарлады Сыртқы істер министрлігінің баспасөз қызметі.

«Астана форматындағы кепілгер елдердің ұжымдық үндеуіне сәйкес 2024 жылғы 24-25 қаңтарда Қазақстанның астанасында Астана процесі аясында Сирия бойынша 21-ші халықаралық кездесу өтеді» деп хабарлады Сыртқы істер министрлігі.  

Келіссөздерге Ресей, Түркия, Иран, Сирия үкіметі мен Сирия оппозициясының делегациялары қатысады. Оған Иордания, Ирак және Ливан елдерінің, сондай-ақ БҰҰ, БҰҰ-ның Босқындар ісі жөніндегі Жоғарғы Комиссары Басқармасының және Халықаралық Қызыл Крест комитетінің өкілдері бақылаушы ретінде қатысады деп күтілуде.

Алдын ала жасалған күн тәртібінде Сирия төңірегіндегі аймақтық жағдайды дамыту, Сирия Араб Республикасындағы жан-жақты реттеуге күш салу, Сириядағы гуманитарлық жағдай және Сирияны қақтығыстан кейінгі қалпына келтіруге жәрдемдесу үшін халықаралық қоғамдастықтың күш-жігерін жұмылдыру мәселелері қамтылған.