СІМ ресми өкілінің талибандармен түскен суретіне желі реакциясы

Сыртқы істер министрлігінің ресми өкілі Айбек Смадияровтың талибан* өкілдерімен түскен суреті әлеуметтік желіде тарады. Қолданушылар суретке бірден өз пікірлерін жаза бастады.

Orda.kz желі қолданушыларының реакциясын бір топтамаға жинады.

17 қазан күні қазақстандық делегация «Талибан» * басшыларымен кездесті. Кездесуден керемет әсер алған СІМ өкілі Айбек Смадияров өз парақшасында жазба қалдырды.

«Кабул шуақты ауа-райымен қарсы алды. Ауғанстан қызық ел. Өзінің көпжылдық тарихымен» делінген жазбада.

Жазбада жарияланған суреттердің ішінде ең көп пікірге ие болған Смадияровтың қос бүйіріндегі мылтық ұстаған талибан* өкілдері.

Orda.kz сайтының сұрағына жауап берген Смадияров жазбасында ешқандай ерекшеліктің жоқ екендігін алға тартты. Бір қызығы жазба жарияланған сәттен бірнеше сағаттан соң, ол дәл осы суретті өз парақшасынан өшіріп тастаған. Оны табу мүмкін болмады.

Айта кетейік, Қазақстанның Ауғанстандағы елшілігі Талибан* өкілдерінің қорғауында.

Бұл сурет бойынша халық шығармашылығын күту ұзаққа созылмады. Иллюстратор Мұрат Ділманов пайдаланушыларға фотосуреттің түсіндірмесін көрсетті.

Әлеуметтік желінің кей пайдаланушылары «баспасөз хатшысының Талибан* өкілдерінің жанында тұруы қорқынышты ма ?» деп сұрауда. Кейбіреулер фотосуретке наразылықтарын танытты.

— «Осылай біз өз беделімізді түсіреміз», «Суретке қарасам, ол тұтқынға түскендей», — деп жазады қолданушылар.

— Мемлекеттік хаттамада делегация болды. Ал бұл мемлекеттік қызметшілер емес... Террористік ұйым деп танылған күзетшілерімен суретке түсу — баланың ісі... тек «хайп» ұстап, ғаламторға салу... көрегендік емес , — деп жазады Марат Отарбаев атты қолданушы.

СІМ-нің ресми өкілінен басқа, «Хабар24» телеарнасының тілшісі Жасын Біркенов те тәліптермен түскен фотосын жариялады.

Ақорда хабарламасында Талибан* қозғалысына Қазақстанда тыйым салынғаны айтылмаған, тәліптерді «Ауғанстанның қазіргі әкімшілігінің өкілдері» ретінде таныстырған.

Қазақстанның кейбір мемлекеттік БАҚ өкілдері «Талибанды» тыйым салынған ұйым ретінде атауды тоқтатты.

Қазақстанда «Талибан»* қозғалысына 2005 жылғы 15 наурыздағы Жоғарғы Соттың шешімімен тыйым салынған. Ол тыйым салынған ұйымдар тізіміне енгізілді. БҰҰ Қауіпсіздік кеңесі Талибанды 2003 жылы террористік тізімге енгізді.

Осы жылдың тамыз айында Талибан Ауғанстанды басып алды. Олар билікке заңсыз келді. Билікке келгеннен кейін, сот және тергеусіз көпшіліктің көзінше дарға асу тәжірибесін қолдана бастады. «Талибан» содырлары музыканттарды ұрып, аспаптарды өртеп, музыканы тыңдауға тыйым салды. Жүздеген музыканттар өз өмірлері үшін қорқып, елден кетуге мәжбүр болды. Мыңдаған ауғандықтар Талибан режиміне бола елден қашты.

Сонымен қатар, «Талибан»* әйелдерге сыртқа шығуға тыйым салды. Оларға кейбір жұмыс түрлеріне, соның ішінде бұқаралық ақпарат құралдарында жұмыс істеуге, спортпен шұғылдануға, университетте оқуға немесе сабақ беруге тыйым салынды.

Талибан* - Қазақстанда тыйым салынған террористік ұйым