СІМ қазақстандықтардың Львовтағы бомбапанадан шығарылмағанын түсіндірді

Қазақстанның Сыртқы істер министрлігі қазақстандықтардың Львовтағы бомбапанадан шығарылмағандығы туралы ақпарат берді.

Әлеуметтік желіде Украинада жүрген қазақстандық әйел оларды бомбапанадан «қуып шыққанын» айтқан болатын.

26 ақпанда өткен брифингте ҚР Сыртқы істер министрлігінің ресми өкілі Айбек Смадияров қазақстандықтарды бомбапанадан ешкім шығармағанын жеткізді. Оның айтуынша, олар мектеп аумағына жасырынған, сондықтан  атқылау қаупі төнген кезде сыртқа шығарылған.

— Қазақстанның Львовтағы құрметті консулдығы ғимаратының алдына Польшаға жіберуге дайындалып жатқан 55-ке жуық Қазақстан азаматы жиналды. Бұл азаматтар жақын маңдағы мектеп аумағын паналаған, бірақ нысанды атқылау мүмкіндігіне байланысты олар сол жерден уақытша шығарылған. Қаңтар айында осындай бейберекетсіздікті  өзіміз де бастан өткердік. Бұл өте қорқынышты және олар әлеуметтік желілерде қызбалықпен жазады. Бомба астында қалу қаупі болғандықтан, оларды осы мектептен шығару  туралы шешім дұрыс болды, - деді Смадияров.

Сыртқы істер министрлігі көлікпен  қамтамасыз етуде проблемалар бар екенін айтты. Шекараға жіберілген алғашқы рейстер әлі оралған жоқ, кезекте тұр. Басқа автобустар кептелісте тұрып қалу қаупіне байланысты жолға шығудан бас тартып отыр. Украина елден әскери борышын өтеуге міндетті ер адамдарды шығармайтындықтан, бір көлікті тексеруге бір сағаттай уақыт кетеді.

— Біз шекараға баруға дайын автобустарды таба алмай жатырмыз. Бейбіт уақытта мұндай көліктің бағасы қолжетімді болса, қазір бір автобус 20 мың долларға өсіп кетті. Біз бұл мәселені шешіп жатырмыз. Азаматтарымыздан шыдамдылық танытуды сұраймыз, - деді Смадияров.

Сол түні Киевтегі Қазақстан елшілігінің ғимаратында 26 адам, оның ішінде сегіз елшілік қызметкері мен алты бала болған.

ҚР Сыртқы істер министрлігі дипломаттары  Украинада «соңына дейін» жұмыс істейтінін мәлімдеді. Олар қазақстандықтарды эвакуациялауға барынша көмек көрсеткеннен кейін ғана оралады.

Сонымен қатар, бүгінге дейін министрлікке Украинада қаза тапқан қазақстандықтар туралы ешқандай ақпарат түскен жоқ.

Еске салсақ, 21 ақпан күні кешке Владимир Путин ЛХР мен ДХР тәуелсіздігін тану туралы жарлыққа қол қойды.

Украина президенті Владимир Зеленский бұл республикалардың тәуелсіздігін тану Ресейдің Минск келісімдерінен біржақты шығуын білдіреді деді.

ҚР Сыртқы істер министрі Мұхтар Тілеуберді Қазақстанның Донецк және Луганск халық республикаларын тану мәселесі күн тәртібінде жоқ екенін айтты. ҰҚШҰ және Ресеймен жасалған әскери келісім аясында қазақстандық әскери қызметкерлерді Украинаға енгізу мүмкін емес.

24 ақпанда Ресей президенті Владимир Путин Донбаста арнайы әскери операция өткізу туралы шешім қабылдады.

Ресейдің Украинаға басып кіруі аясында Қасым-Жомарт Тоқаев ЕАЭО мүшелеріне тәуекелдерді бағалау үшін жұмыс тобын құруды ұсынды.