СІМ: Қазақстандықтар Армения,Беларуссия арқылы Ресейге кіре алмайды

Қазақстандықтар Ресейге Армения мен Беларуссия арқылы барудың жаңа механизмін қолдана алмайды, деп хабарлады Сыртқы істер министрлігінің баспасөз қызметі.

Қаңтардың соңында Ресей үкіметінің бұйрығы жарияланды, оған сәйкес Еуразиялық экономикалық одақ мемлекеттерінің азаматтары Ресейге Беларуссия мен Армения территориялары арқылы 2021 жылдың 1 ақпанынан 1 наурызына дейін кіре алады.

«Бұл саяхат механизмі Covid-19-ға теріс ПТР сынағының сертификаттарын «Сovid-19» мобильді бағдарламасында тіркеуді қарастырады. Қазақстан оған қатыспайтындықтан Қазақстандықтарға Ресейге Армения мен Беларуссия арқылы кіруі мүмкін болмайды», - деді СІМ.

Министрлік Ресей енгізген мемлекеттік шекараны кесіп өтуге қатысты шектеулер бүгінгі күні де өз күшін жоймағанын атап өтті. Олар Ресейге үшінші елдер арқылы транзитсіз тікелей рейстермен келетін немесе елге кіру үшін тиісті негіздері бар Қазақстан азаматтарына қолданылмайды.

Бүгінде Қазақстан мен Ресей арасында аптасына екі жақтан үш рейс бар (Нұр-Сұлтан - Мәскеу - аптасына екі рет, Алматы - Мәскеу - аптасына бір рет).