Си Цзиньпин мен Ердоған Назарбаевқа жеделхат жолдады

Нұрсұлтан Назарбаевқа Қазақстан Тәуелсіздігінің 30 жылдығына орай шет мемлекет басшыларынан құттықтау жеделхаттары мен хаттар келіп түсті.

Elbasy.kz мәліметінше, ҚХР төрағасы Си Цзиньпин Қытай халқының және жеке өзінің атынан Елбасын және барша қазақстандықтарды мерекемен құттықтады. Сондай-ақ, Қазақстанның тұңғыш президенті басшылығымен осы жылдар ішінде мемлекеттік даму ісінде қол жеткізген жетістіктерді атап өткен.

– Сіздің дана басшылығыңызбен Қазақстан табысты даму жолына түсті және Еуразия өңіріндегі ықпалды мемлекетке айналып, Мемлекеттік құрылыс ісінде тамаша жетістіктерге жетті. Достық көрші және мәңгілік жан-жақты стратегиялық серіктес ретінде Қытай бұған шын жүректен қуанышты. Қазақстан мемлекеттің 2050 жылға дейінгі даму стратегиясын табысты іске асыра отырып, елдің әлеуетін нығайтып, халықтың әл-ауқатының деңгейін арттыра беретініне сенімдімін, - делінген Си Цзиньпиннің жеделхатында.

Түркия президенті Режеп Тайып Ердоған да Тәуелсіздіктің 30 жылдығына орай Нұрсұлтан Назарбаевқа және Қазақстан халқына жылы лебізін білдірді.

Ердоған 2021 жылғы 12 қарашада Ыстамбұлда өткен Елбасының тікелей қолдауымен құрылған Түркі мемлекеттері ұйымы саммитінің нәтижелерін баса айтты.