Си Цзиньпин Қытай әскерін «соғысқа дайындықты күшейтуге» шақырды

Қытай басшысы Си Цзиньпин Қытай армиясын «соғысқа дайындықты жан-жақты күшейтуге және әскерлердің сенімді жауынгерлік әзірлігін қамтамасыз етуге» шақырды, деп хабарлайды Orda.kz сайты РБК-ға сілтеме жасап.

Бұл туралы ол Қытай Халық-азаттық армиясының зымыран бригадасында болған кезде айтты.

Қытай Халық Республикасы төрағасының айтуынша, қытайлық сарбаздар «өздерінің стратегиялық тежейтін ​​және жауынгерлік мүмкіндіктерін күшейтуі керек».

Си Цзиньпиннің мәлімдемесі Қытай әскері Бейжің өз территориясы деп санайтын Тайвань маңында ауқымды жаттығулар өткізгеннен кейін бірнеше күн өткен соң жасалды.

14 қазанда Қытай армиясы Тайвань маңындағы су айдындарында оқу-жаттығулар өткізді. Аға полковник Ли Си бұл жаттығу Тайвань тәуелсіздігіне ұмтылған «сепаратистік күштерге» арнайы «қуатты» тосқауыл болу үшін жасалғанын айтты.

Тайвань билігі Қытай әскери жаттығуларын арандатушылық деп атады. Жаттығу барысында аралдың әуе қорғанысы аймағына 90 ұшақ, тікұшақ және ұшқышсыз ұшақтар кірді.

Қытай Мемлекеттік кеңесінің Аралдар істері басқармасының төрағасы Чен Бинхуа Тайвань Қытаймен қақтығыс өршіп кетсе, елдің жойылуы мүмкін екенін ескертті.

«Біз ешқашан күш қолданудан бас тартуға міндеттеме бермейміз. <...> Тайваньның қанша әскері бар немесе қанша қару сатып алғаны маңызды емес және сыртқы күштердің араласқаны немесе араласпағаны да маңызды емес. Егер (Тайвань.ред) тәуекелге баруға батылы барса, бұл өзінің жойылуына әкеледі», - деді ол. 

Америка Құрама Штаттары Тайваньды қару-жарақ пен әскери техникамен қамтамасыз етеді, бірақ америкалық билік «бір Қытай» қағидатын ұстанатынын мәлімдейді. Америка президенті Джо Байден Қытайдан ықтимал шабуыл болған жағдайда аралды қорғауға бірнеше рет уәде берген болатын.