Шыңғыс Айтматовтың қарындасы жазушының 100 жылдығын тойлаудан бас тартуға шақырды

Қырғыз жазушысы, әлем әдебиетінің классигі Шыңғыс Айтматовтың туғанына 100 жыл толуына орай жоспарланып отырған шараларға қатысты оның қарындасы Роза Айтматова Үкіметке үндеу жасады, деп хабарлайды Orda.kz.

24KG мәліметінше, Роза Айтматова мерейтойлық іс-шараларды өткізбей, оған бөлінетін қаражатты қарапайым халықтың өмір сапасын жақсартуға жұмсауды сұрады. Айтматованың айтуынша, қоғамда «Айтматовтың 100 жылдығына кеткен қаржыны басқа маңызды мәселелерге бағыттауға болар еді» деген пікірлердің туындауы заңды. Сол себепті ол биліктен алдын ала осы қаражатты әлеуметтік қажеттіліктерге бағыттауды өтінді.

«Бұл — Шыңғысқа деген ең шынайы құрмет болар еді», — деп атап өтті ол өз мәлімдемесінде.

Сондай-ақ Роза Айтматова жазушының дүниеден өткеніне 17 жыл өтсе де, оның есімі әлі күнге дейін қоғамда түрлі талқылаулар мен сын нысанына айналып келе жатқанын айтты. Ол марқұмның рухын мазаламауға және есімін орынсыз дауға араластырмауға шақырды.

«Шыңғысты мадақтаудың да, қаралаудың да қажеті жоқ. Ол тыныштықта мәңгілік дамыл тапсын», — деді Роза Айтматова. 

Еске сала кетейік, Олимпиада чемпионы Серік Сәпиев өзінің орынбасары Дәурен Есімхановпен даудың неден басталғанын айтып берді.