Шымкенттен Германияға тікелей әуе қатынасы ашылады

27 мамырдан бастап SCAT әуе компаниясы Шымкент – Мюнхен жаңа бағытын ашады, деп хабарлайды Orda.kz ҚР Көлік министрлігінің баспасөз қызметіне сілтей отырып.

«Биылғы жылдың 27 мамырынан бастап қазақстандық SCAT әуе компаниясы Шымкент-Мюнхен бағыты бойынша Германияға жаңа бағыт ашуды жоспарлап отыр» деп жазылған хабарламада.

Ұшулар аптасына үш рет – сейсенбі, бейсенбі және сенбі күндері орындалады.

Осылайша, Қазақстан мен Германия арасындағы рейстердің жалпы саны аптасына 11-ден 14-ке дейін артады.

«Әуе қатынасының ашылуы екі ел арасындағы сауда-экономикалық, іскерлік және туристік ынтымақтастықты одан әрі дамытуға ықпал етеді деп күтіледі», деп атап өтті ведомство.