Шымкенттегі перзентхана маңындағы жарылыстан  үш адам қаза тапты

Шымкенттегі перзентхана маңында болған жарылыстан қаза тапқандар саны үшке жетті, деп хабарлайды ҚР Денсаулық сақтау министрлігінің баспасөз қызметі.

Алдын ала мәлімет бойынша, бүгін түске таман жергілікті перзентхана маңында орналасқан дәріханада оттегі баллоны жарылды. Жарылыс өртке ұласты. Жарылыс толқынынан ең жақын тұрғын үй, перзентхана және бірнеше көлік зақымданған.

«Қайғылы оқиғаның құрбандары 1979 жылы туған күзетші Б., 1980 жылы туған жұмысшы Ш.,  туғанына  18 күн ғана болған  жаңа туған  сәби. Сондай-ақ,  сегіз адам зардап шекті, олардың барлығы қаланың емдеу мекемелеріне жатқызылды» деді Денсаулық сақтау министрлігі сенбіде.

Еске салайық, Шымкентте 21 мамыр күні таңертең перзентхана маңындағы дәріханада жарылыс болды. Марқұм күзетшінің денесі жарылыс болған жерден табылды. Жарылыстан кейін босанған әйелдер мен жаңа туған нәрестелер ауруханадан эвакуацияланды. Жарылыс салдарынан жаңа туған нәрестелердің бірі қайтыс болды. Аталған іске қатысты сотқа дейінгі тергеу басталды.

Денсаулық сақтау министрлігінде атап өткендей, перзентхана Түркістан облысының жеті ауданына бірден қызмет көрсететін.  Оқиға  салдарынан облыс жүкті әйелдер мен жаңа туған нәрестелерді қабылдау бағытын шұғыл өзгертуге мәжбүр болды.