Шымкентте жиһаздарды робот жасайды

Mega smart компаниясы дәл осындай автоматты конвейер желісін іске қосқан, деп хабарлады «Хабар 24».  Осыдан соң зауыт жұмыс көлемі мен табысын  едәуір арттырған.

Фабрикада ай сайын 30 мың шаршы метр плита мен бес мың жиһаз шығарылады. Бірнеше жыл бұрын бұл шеберханада санаулы ғана  станок болған. Ендігі жерде барлық жұмыс толығымен автоматтандырылған. Тіпті бүгінде фабрикада жиһазды роботтар дайындайды. Бұл кәсіпорынның кірісін арттыруға үлкен себеп.

Ең басында зауыт директоры Сергей Хегай жұмысты бастағанда бұл жерде  шағын гараж бен екі жұмысшы болған. Қазір Сергейдің фабрикасынан шыққан өнімдерді тек шымкенттіктер  ғана емес  өңір түгел дерлік пайдалануда.

 Жиһаз фабрикасы бүгінде  халықаралық стандартқа сай өнімдер шығарады. Түркістандағы Hampton By Hilton қонақ үйіне аталған компания жүз мың дана сәнді жиһаз жасаған. Фабрика өнімдері сондай-ақ Орталық Азия елдеріне, Ресей мен Беларусь мемлекетіне де экспортталады.

«Біз ISO-9001  халықаралық сапа менеджменті туралы халықаралық сертификаттаудан өттік. ISO-14001  экологиялық сапа менеджменті мен OHSAS сертификаттары да бар. Қызметкерлердің қауіпсіздігі үшін барлық жағдайды жасап жатырмыз. Сондықтан да Hilton қонақ үйлер желісінде аккредитациядан өттік», - дейді Mega smart компаниясының басшысы Сергей Хегай.

Зауытта бояулар жасалатын жеке зертхана құрылған, онда  түрлі түстерге тәжірибе жасалады. Компания рельеф түрінде жабынды жасаудың технологиясына  да патент алған. Фабрика, осылайша, жиһаз индустриясына инновациялар алып келді. Бұл жұмыстар отандық жиһаздың сапасы мен бағасының қолайлы болуы үшін қажет.