Шымкентте жасөспірімді сабаған күзетші 3 жылға сотталды

Шымкенттегі қылмыстық істер бойынша ауданаралық сотта «G.» ЖШС мекемесінің күзетшісі И.-ге қатысты іс қаралды. Жасөспірімді резеңке таяқпен сабаған күзетші 3 жылға сотталды, деп хабарлайды Orda.kz.

28 маусымда И. күзет қызметін атқарып жүріп, футбол алаңының қоршауынан секіріп өткен жасөспірімді ұстап алып, кешірім сұрағанына қарамастан, резеңке таяқпен бірнеше рет ұрды. Осылайша, жасөспірімге жеңіл жарақат келтірілді.

Сот И.-нің кінәсін дәлелдеді. Прокурор үш жыл бас бостандығынан айыруды және екі жылға күзет қызметімен айналысу құқығынан айыруды сұрады. Зардап шегушінің өкілі кінәліні кешіріп, жазаны соттың қарауына қалдырды. Айыпты өз кінәсін мойындап, бас бостандығынан айырмайтын жаза сұрады.

Сот оған 3 жыл бас бостандығынан айыру жазасын тағайындады.

«Жаза тағайындау барысында сотталушының қылмыстық жауапкершілігі мен жазасын жеңілдететін мән-жай ретінде қылмысын мойындап, шын ниетпен өкінгенін, жәбірленуші өкілінің кешірім беруін ескерді, ал қылмыстық жауаптылығын ауырлататын мән-жайлар анықталған жоқ.
Сот, И. ҚК-нің 252-бабының 2-бөлігімен кінәлі деп танып, күзет саласында лауазымды қызмет атқару құқығынан 2 (екі) жыл мерзімге айыра отырып 3 (үш) жыл мерзімге бас бостандығынан айыру жазасын тағайындады»,  деп мәлімдеді Шымкент қалалық соты.