Шымкентте жас қыз көпірден секірмек болды

3 шілде Шымкент қаласының Еңбекші ауданында көпірдің қоршауынан асып, өз-өзі қол салу үшін секіріп кетейін деп тұрған қызды ҚР Ұлттық ұланының 6506 бөлімінің әскери қызметкерлері құтқарып қалды.

Бұл туралы Ұлттық ұланының «Оңтүстік» өңірлік қолбасшылығы хабарлады.

Ұлттық ұланының 6506 әскери бөлімінің әскери қызметшілері Шымкент қаласының Еңбекші ауданында патрульдік қызмет барысында жас қыздың көпірден секірейін деп тұрғанын көреді.

Қызметкерлер мәліметті жақын маңдағы патрульдік топтың бастығы Раулан Өтебаевқа жеткізді. Ол қатардағы патрульдік қызметтегілер Арыстанбек Анарбай және Дулат Ауғанбаевпен бірге көрсетілген жерге жедел жетті.

«Көпірден секірмек болған қызды көріп, бірден оған қарай бет алдық. Бұл кезде ол көпірдің қоршауының сыртына шығып тұрды. Бізді көпірден бір-ақ секіремін деп қорқытты», – дейді қатардағы жауынгер Раулан Өтебаев.

Күзетшілер қызбен әңгімелесіп, оны райынан қайтаруға тырысты. Осы кезде жақын маңнан өтіп бара жатқан адамдар да қызды көндіріп көрді. Сәл күткеннен кейін, ұлттық ұлан секірейін деп тұрған қызды шап беріп ұстап қалды. Осыдан кейін оны сабасына түсіріп, полиция қызметкерлеріне тапсырды.

Айта кетейік, әскерилерге аты-жөнін жасыруды жөн көрген жергілікті тұрғын белсенді түрде көмектесті. Осылайша тәртіп сақшылары мен азаматтардың көмегінің арқасында тағы да бір адам аман қалды.