Шымкентте зейнеткерді таныстары ұрып-соғып, үшінші қабаттан лақтырып жіберген

Шымкентте ер адамды таныстары соққыға жығып, кейін биіктен лақтырып жіберген, деп хабарлайды Orda.kz. 

Қайғылы оқиға 12 наурызға қараған түні болған. Қабанбай батыр көшесіндегі №11 үйдің ауласынан биіктен құлаған белгілері бар 77 жастағы ер адамның мәйіті табылды.

Алдын ала ақпарат бойынша, марқұм үшінші қабаттағы пәтерде болған. Ол екі досымен бірге ішімдік ішкен. Алайда достардың арасында жанжал туындап, екі досы жәбірленушіні ұрып-соғып, терезеден лақтырып жіберген. Зейнеткер алған жарақаты салдарынан сол жерде қайтыс болды.

Полиция екі күдіктіні - 66 жастағы ер адам мен 44 жастағы үйсіз адамды ұстады. Олардың үстінен қылмыстық іс қозғалды. Тергеу жалғасып жатыр.