Шымкентте қуғын-сүргін құрбандары бейіттерінің үстіне жол төселіп жатыр

Шымкентте қуғын-сүргінге ұшырағандар жерленген жерге жол салына бастады. Бұл жер сталиндік қуғын-сүргін кезінен бері «Қайтпас» деп аталады.

31 арнаның хабарлауынша, жергілікті тұрғындар жерлеу орнында құрылыс жұмыстарын жүргізбеу туралы өтінішпен әкімдікке бірнеше рет жүгінген. Алайда тұрғындардың айтуынша, шенеуніктер олардың қарсылығына құлақ аспады.

«Осы жерде, сайда жасырын атып, зиялы қауымды түнде әкеліп, өлтірген» дейді жергілікті тұрғын Өлмесхан Жәнібеков.

Жұртшылықтың ішінде жол апаттары бұрын бейіт орнына төселген жолдың үстінде орын алатыны туралы сыбыстар бар.

Мердігер мекеме басшысы Әлішер Ханалиевтің айтуынша, бас жоспарда бұл жерде қорымдар туралы мәлімет жоқ.

«Ұсынылған жобамен жұмыс істеп жатырмыз. Қазір құрылысты тоқтаттық» деді ол.

Шымкент қалалық құрылыс бөлімінің бас маманы Шамиль Аманқұлов бұл мәселе жан-жақты қарастырылатынын қадап айтты.

«Жобалаушыға ұсыныстар береміз, өзгертулер енгіземіз. Жобаны ауыстыруға, жылжытуға болады» деді Шамиль Аманқұлов.

Бейіттерді қорғауға тырысқан тұрғындар қазір үкіметтен көмек сұрап жатыр. Олар бұл жерді мемлекет қарауына алуды сұрауда.