Кентауда оқушылар төбелесіп, бір бала қайтыс болды

Түркістан облысы Кентау қаласында екі ауылдың оқушылары төбелесіп, бір адам қайтыс болды.

Кентау қаласының әкімі Жандос Тасовтың Orda.kz тілшісіне айтуынша, 15 қыркүйекке қараған түні Қармақ және Шекербұлақ ауылының оқушылары арасында жанжал болып, бір адам қайтыс болған.

Облыстық полиция департаментінің мәліметіне сәйкес, қайтыс болған адам – 10-сынып оқушысы. Пышақ жарақатын алған марқұмның денесі ауыл маңынан табылған.

«Түн ортасында екі ауылдың оқушылары арасында тұрмыстық жанжал болған. Бір күдікті ұсталған. Қалған күдіктілерді ұстау шаралары жүруде» дейді полиция.

Оқиғаға байланысты Қылмыстық кодекстің «Адам өлтіру» бабымен (99-бап) қылмыстық іс қозғалған. Тергеу амалдары жүріп жатыр.

Дилара Иса, Шымкент қаласы