Шымкентте тергеуде қаза тапқан Жұмабаевтың ұсталған сәті жарияланды

Шымкентте полицейлердің қолынан қаза тапқан Нұрболат Жұмабаевтың ұсталған сәтінің бейнежазбасы желіде жарияланды.

Видео telegram-арнада жарияланды.

Жазба мәтінінде «мән беріп қарасақ, арнайы жасақ оны көшеден ұстап, алып кетті. Ол қашпады, ешқандай қарсылық білдірмеді. Бірақ оны қандай да белгісіз бір себептермен ұрған.

Екінші ұсталған Сергей Петров кафе ішінде тыныш тамақтанып отырған, ешқандай қарсылық көрсетпеді. Арнайы жасақ кафенің ішіне кіріп, күш қолданған» делінген.

Еске салсақ, 8 желтоқсан күні сағат 17:00-де Шымкент қалалық полиция департаментінің ғимаратында жауап алу үшін 1990 жылғы Нұрболат Жұмабаев жеткізілді, ол қала аумағында бірнеше қымбат шетелдік көлік ұрлады деген күдікпен ұсталған. 31 жастағы азамат тергеу кезінде қаза тапты.

Марқұмның әкесі Ерқара Жұмабаев Шымкент қалалық полиция департаментінің алдына келген, полицейлер оның денсаулығына шағымданғанын алға тартқан. Бірақ әкесі ұлының жүрегі ауырғанына сенбей отыр, себебі ол спортпен шұғылданған. Марқұмның әкесі полицейлер ұлын «ұрып өлтірді» деп санайды.

Жұмабаевпен бірге ұсталған досы Сергей Петров полиция бөлімшесінен әр түрлі жарақаттармен шықты.

— Басымызға қап кигізіп, соққыға жықты. Сосын полиция департаментіне алып келді. Бізді онда жедел уәкіл қызметкерлері ұрып-соқты. Жұмабаевты да ұрды. Мен бәрін көрдім. Басымызға күртемізді орап тастады. Қолдарымызға кісен салды. Менің басымнан күрте түсіп кетіп жатты. Жұмабаевты әкетіп бара жатқанын, соққыға жыққанын көрдім, - деді ол.

Тергеу кезінде көз жұмған Нұрболат Жұмабаевтың ісі бойынша үш полицей жауапқа тартылды.

Шымкент қалалық мамандандырылған тергеу сотында Нұрболат Жұмабаевтың ісі қаралып, екі подполковник пен бір полковник тергеу аяқталғанша екі айға қамауға алынды.