Шымкентте төбелес соңы адам өлімімен аяқталды

Шымкентте көпшілік алдында басталған төбелес арты адам өлімімен аяқталды.

Отырар басылымының хабарлауынша, бірі екіншісін пышақтауға дейін барған.

«Қайғылы оқиға 27 наурыз күні сағат 19:17 шамасында, көшеде, куәгерлердің көзінше күннің жарығында орын алған. Жантүршігерлік төбелес бейнебақылау камераларына түсіп қалған. Сондай-ақ, айнала куәгерлерге толы болған. Жедел жәрдем көлігінің жанында тротуарда жатқан адам мәйіті бейнеленген видео мессенджерлер арқылы тарады. Кадрда екі ер адамның жанжалы төбелеске ұласып, бірі екіншісін пышақтап кеткенін көруге болады. Ер адам оқиға орнында көз жұмды» делінген хабарламада.

Оқиға орнына патрульдік полиция, жедел-тергеу тобы және аудан прокурорлары келді.

«Бұл дерек ҚР Қылмыстық кодексінің 99-бабы (кісі өлтіру) бойынша Сотқа дейінгі тергеулердің бірыңғай тізілімінде тіркелді. Оқиға орнында күдікті қамауға алынды. Ол уақытша тергеу изоляторына орналастырылды. Қазір тергеу амалдары жүргізілуде. Бірқатар сараптамалар тағайындалды. Алдын ала болжам бойынша, ауыр қылмыс жасауға қызғаныш себеп болған» деді Шымкент қалалық ІІБ ресми өкілі Салтанат Қаракөзова.