Шымкентте спорттық үйірме жетекшілері әкімдік алдында наразылық өткізді

23 қыркүйек күні Шымкент қаласы әкімдігі алдына «Артспорт» бағдарламасы негізінде мемлекеттің есебінен тегін балаларды жаттықтыратын спорт және шығармашылық үйірмелерінің жетекшілері жиналды. Олар әкімдік шілде, тамыз айының төлемақысын өтемегеніне наразы. 

Жиналғандардың айтуынша, әкімдік балаларды тегін үйірмеге тартқанымен, соңғы екі айда ақысы төленбеген. Әкімдік үйірмелермен келісім-шартқа отырғанымен төлеп беруге кепілдік бермей отыр.

 - Мысалы, шығармашылық бағыт бойынша жоспарда 6 мың воучер болса да басқарма 36 мың воучерді тіркеп жіберген. Әкімдік ақша бөлгенімен уақтылы бақылап, қадағаламаған. Егер қарыз өтелмесе қазан айынан бастап үйірмелер жұмысты тоқтатуға мәжбүр. Өйткені, жалға алынған ғимарат пен үйірме қызметкерлерінің жалақысын төлей алмай отырмыз, - дейді «Ритм» би орталығының директоры Раиль Файзуллин. 

«Ешқайсымыз ерігіп жүрген жоқпыз», «Артспортпен» жұмыс істейміз деп шығынға баттық», «Заң бойынша жұмыс істеңіздер» деп айқайлады жиналғандар.

- «Артспорт» бағдарламасы бойынша қылмыстық іс қозғалып, тергеу жүріп жатыр. Жауапты адамдар мен ұрланған ақша кері қайтарылғаннан соң шілде, тамыз айының ақысы төленуі мүмкін. Қазір екі айға төлем жасауға мүмкіндік жоқ, - дейді наразылармен келісімге келуге шыққан қала әкімінің орынбасары Мақсұт Исахов.

Бұған жиналғандар келіспей, прокуратураға шағым жазуға кетті.

Шілде айында  қалалық мәдениет, тілдерді дамыту және архивтер басқармасының басшысы қамауға алынғаны туралы ақпарат тарады. Сыбайлас жемқорлыққа қарсы іс-қимыл агенттігі басқарма басшысы «Артспорт» платформасы арқылы балалар шығармашылығын қаржыландыруға бөлінген ақшаны ұрлауды ұйымдастырды деп айыптайды.

Дилара Иса, Шымкент қаласы