Шымкентте сауда үйі өртеніп, ғимарат ішіндегі адам терезе арқылы шықты

19 қыркүйек күні Шымкенттегі Buy Park сауда ойын-сауық орталығында өрт шықты. Ғимарат ішінде жүрген адамның терезе арқылы шығуына тура келді, деп хабарлайды Orda.kz. 

Шымкенттегі Төлеметов көшесінде орналасқан Buy Park сауда ойын-сауық орталығы бірден өртке оранған. ТЖМ мәліметінше, адамдар өздері сауда орталығынан шығып кеткендіктен эвакуациялау қажет болмаған. Бірақ ғимарат ішінде бір адам қалып кетіп, ол өз бетінше терезе арқылы сыртқа шықты. Оған айналадағы адамдар мен құтқарушылар көмекке келді. 

Әлеуметтік желі қолданушысы Мира Мырзашова  ол адамның ағасы екенін мәлімдеді. 

«Бұл – менің туған ағам. Ол ештеңе көрінбегенін айтады. Спортзал ішінде жаттығумен айналысып жүрген, осы жақта терезе барын есінде сақтап, көзін жұмып, терезені ашып сыртқа шыққан. Қазір ауруханада жатыр, жағдайы жақсы», – деді ол желідегі парақшасында.

Айта кетейік, Шымкентте 21 қыркүйек күні түстен кейін мешіттің шатыры өртке оранды.