Шымкентте қалың қар жауып, оқушылар онлайн оқуға көшті

Шымкентте бір тәуліктен бері жауған қалың қардан қала көшелерінде көлік жүру қиындады. Түстен кейін қалалық білім басқармасы оқушыларды онлайн сабаққа көшірді. 

9 қаңтар түстен кейін басталып тоқтамаған қардың қалыңдығы шамамен 30-40 сантиметрге жетті. Бірінші ауысымда оқитын оқушылар сабаққа барғанымен, қалалық білім басқармасы түстен кейін 1-8 сынып оқушыларын онлайн сабаққа жіберді. 

«Ауа-райының қолайсыздығына байланысты балалардың өмір қауіпсіздігін қамтамасыз ету мақсатында жалпы білім беретін білім беру ұйымдарындағы 1-8 сынып оқушылары үшін ағымдағы жылғы 10-11 қаңтар күндері қашықтан оқыту ұйымдастырылып, ал 9-11 сынып оқушылары дәстүрлі форматта білім алуды жалғастыратын болады» делінген басқарма хабарламасында.                 

Төтеншеліктер кешеден бері қалың қар жауып, көктайғақ болатынын, тұман түсетінін ескертіп жатыр. 

Таңға дейін жауған қардан қала ішінде көлік жүру қиындады. Коммуналдық қызметкерлер орталық көшелердің өзін тазалап үлгермей жатыр. Салдарынан қарға батқан жеңіл және қоғамдық көліктер көбейді. Әр жерде полиция қызметкерлері көлік қозғалысын реттеуге араласып жүр.