Шымкентте полиция басшысының орынбасары әріптесін зорлады деген күдікке ілінді

Шымкент қаласында Еңбекші аудандық полиция басқармасы бастығының орынбасары, майор Ерлан Жұманов әріптесін зорлады деген күдікпен тергеліп жатыр, деп хабарлайды Orda.kz.

Полиция департаментінің мәліметінше, жәбірленуші де құқық қорғау органының қызметкері. Қазіргі уақытта оның жүкті екені анықталған.

Қылмыстық іс ҚР Қылмыстық кодексінің 120-бабы бойынша тіркеліп, тергеуді Тұран ауданының полиция басқармасы жүргізіп жатыр. Сараптамалар тағайындалған.

«Әйел адамның шағымы негізінде қылмыстық іс қозғалды. Қазір болған оқиғаның барлық мән-жайын анықтауға бағытталған тергеу амалдары жүргізіліп жатыр. Алдын ала дерек бойынша, жәбірленуші мен күдікті бұрын жақын қарым-қатынаста болған. Тергеу аяқталғаннан кейін заңға сәйкес шешім қабылданады»,  деп мәлімдеді Шымкент қалалық полиция департаменті.