Шымкентте пойыз қағып қаза тапқан адамға қатысты тергеу басталды

Шымкент қалалық көлік полиция басқармасы теміржолдағы оқиғаға қатысты түсініктеме берді, деп хабарлайды Orda.kz.

Полицияның мәліметінше, оқиға 21 қыркүйекте болған. Теміржолдағы адам өліміне қатысты оқиға бойынша сотқа дейінгі тергеу басталды.

«Абайсызда адам өліміне әкеп соқтырған жол қозғалысы немесе теміржол көлігін пайдалану қауіпсіздігі ережелерін бұзу фактісі бойынша Шымкент стансасындағы желілік полиция бөлімшесінде сотқа дейінгі тергеу басталды»,  деп хабарлады департаменттің баспасөз қызметі.

Полиция ҚР Қылмыстық-процестік кодексінің 201-бабына сілтеме жасап, басқа мәліметтерді бермеді.

Otyrar.kz басылымының хабарлауынша, ер адам шамамен 30-35 жаста, оқиға сенбі күні кешкі сағат ондар шамасында болған.

Темір жолды кесіп өтпек болған ер адамды пойыз қағып кетті.  Өмірге сәйкес келмейтін жарақаттар салдарынан ер адам қайтыс болды. Ол жай ғана жолды кесіп өткісі келді ме, әлде осылайша өмірмен қоштасқысы келді ме, оны анықтау полиция құзырында.