Шымкентте парамен ұсталған ҚАЖД басшысы айыппұлмен құтылды

Шымкент қаласы және Түркістан облысы бойынша қылмыстық-атқару жүйесі департаменті басшысының міндетін уақытша атқарып жүрген кезде «алаяқтық жасады» және «пара алды» деген күдікпен ұсталған Пархат Исақбаевқа сот айыппұл салды.
Исақбаевтың ісін Әл Фараби аудандық сотының судьясы Талғат Қаһаров қарады.
Сот 46 жастағы Исақбаевты Қылмыстық кодекстің «Пара алу» бабы (366-бап) және «Алаяқтық» бабымен (190-бап) кінәлі деп танып, 9 миллион теңге айыппұл салды. Қамауда жатқан ол сот залынан босатылды.
2022 жылдың ақпан айында әділет подполковнигі Исақбаев департамент басшысының орынбасары қызметіне тағайындалған. Төрт айдан соң департамент басшысының міндетін уақытша атқару міндеті жүктелген. Арадан 10 күн өткенде арнайы жасақ ұстаған.
«Сот кабинеті» жүйесіне ілінген қаулыда Исақов ИЧ-167/3 түзеу мекемесінде отырған сотталушының жазасын жеңілдету үшін дайындалатын құжаттарды сотқа жылдам өткізу үшін үш жүз мың теңге пара және күдікке ілінген адамды қамауда қалдырмауға ықпал етемін деп оның туысынан жүз мың теңгені алаяқтық жолмен алғаны жазылған.
Сотта Исақбаев жасаған іс-әрекеттіне өкінген, қатаң жаза тағайындамауды сұраған.
Сот Исақбаевтың жазасын жеңілдету барысында оның өкінетінін, бұрын сотты болмағанын және жас балаларының бар екенін ескерген.
Бұған дейін Facebook-те қолына кісен салынған, Исақбаевқа ұқсас адамды арнаулы жасақтың әкетіп бара жатқаны жөнінде видео тараған. 11 шілде күні сот санкциясымен екі айға қамалғаны хабарланды.

Дилара Иса, Шымкент қаласы