Шымкентте оққа ұшқан 20 адамның 19-ы «Қаңтар оқиғасының кездейсоқ құрбаны» деп танылды

«Қазақстан халқына» қоғамдық қоры Қаңтар оқиғасында зардап шеккендерге көрсетілген қайырымдылық көмек туралы ақпарат жариялады. Оның ішінде оқиға кезінде кездейсоқ құрбан болған 135 адамның тізімі бар. 

Қор мәліметінше, Қаңтар оқиғасында Қазақстанның 10 аймағында 135 адам кездейсоқ қайтыс болған. Олардың әрқайсысының отбасына 7 млн теңге көмек берілген. 

Ресми мәліметке қарағанда, Шымкентте Қаңтар оқиғасында 20 адам қайтыс болған. Олардың 19-ы «Қазақстан халқына» қоғамдық қоры жариялаған «Қаңтар оқиғасының кездейсоқ құрбаны» тізіміне кірген. 1 адамның бұл тізімге кірмеу себебі белгісіз. 

Бұған дейін 20 адамның өліміне байланысты Қылмыстық кодекстің «Адам өлтіру» бабымен қылмыстық іс қозғалғанымен, кейіннен Шымкент қалалық прокуратурасы  «қылмыс құрамының болмауына байланысты сотқа дейінгі тергеп-тексеруді тоқтатқан». Ал қайтыс болған адамдардың үстінен «Жаппай тәртіпсіздік» бабымен іс қозғалып, күдікті деп танылған.