Шымкентте «Назира Голд» ісіне сот үкімі шықты: халықты алдап, 16 млрд теңге жымқырғандар сотталды

Шымкентте атышулы «Назира голд» ісіне сот нүктесі қойылды. 28 жастағы Нәзира Нұржанова жұртты «ақшаға қарық қыламын» деп алдап, алтындарын жинап алған. Салымшыларға ай сайын пайданың 20-40 пайыз жіберіп отыратынын айтқан. Сот оған 10 жылға бас бостандығынан айыру жазасын тағайындады, деп хабарлайды Orda.kz.

Еліміз бойынша алданғандар саны төрт мыңнан асады, алайда сотта олардың 148-і ғана жәбірленуші ретінде танылды. Сот дерегінше, азаматтар Нұржановаға 1 миллионнан 50 миллион теңгеге дейін ақша тапсырған. Судьяның айтуынша, айыпталушылардың есепшотына кей күндері 600 миллион теңгеге дейін қаржы түсіп отырған.

«Жәбірленушілердің аударылған 16 миллиард ақшасын қоса алған кезде, тәркіленген алтын бұйымдармен бірге санаған кезде ары кетсе 2 миллиардқа жетер жетпес дүние-мүлік болады. Қаржы пирамидасының тағы белгісі деп отырғанымыз – 16 млрд теңгеден 2 миллиарл бар. Қалған 14 миллиардтың ізі жоқ», – деді Мадияр Әбдірасыл.

 Еске салайық, «Назира Голд» ұйымы биыл ақпан айында әшкереленген еді. Бір жылға жуық жүргізілген тергеу мен сот талқылауы нәтижесінде ұйымның басшысы 10 жылға бас бостандығынан айырылды, ал оның сыбайластары 5 жылға сотталды. Алайда, сотталғандардың жетеуі кәмелетке толмаған балалары бар аналар болғандықтан, олар жазасын перзенттері 14 жасқа толған соң өтейтін болды.

«Мені 2022 жылы алдаған. 2023 жылы тағы 11 адамды алдаған. Ол бұрын да бірнеше рет сотталған. Ал сот оны үйқамаққа жіберді. Бұл әділетсіз шешім. Мен 25 миллион теңгенің, яғни 1 келі алтынның затын тапсырғанмын. Әлі күнге дейін әділ шешім көрген жоқпын. Барлық дәлел қаралмады. Енді Жоғары сотқа шағымданамын», – деді Қарлығаш Бекболатова есімді жәбірленуші.

Нәзира Нұржанова да үкіммен келіспейтінін айтып, кінәсіз екенін дәлелдеуге ниетті. Судьяның сөзінше, ол сот барысында «жиналған ақшаны қайтарамын» деп уәде берген. Дегенмен, сенуден қалған зардап шеккен жұрт енді істі Жоғары сотта қайта қарауды талап етпек.

Айта кетейік, тергеу барысында назардан тыс қалған тағы бірнеше күдіктіге қатысты іс әлі жалғасып жатыр.