Шымкентте мұғалімнен 1,2 млн теңге бопсалаған блогер кім?

Шымкенттік блогер мұғалімнен 1,2 миллион теңге бопсалады деген күдікке ілінді, деп хабарлайды Orda.kz.

Полицияға жалпы білім беретін мектептердің бірінің мұғалімі жүгінген. Оның айтуынша, блогер өзінің танымалдығын пайдаланып, ол туралы масқаралайтын ақпарат жариялаймын деп қорқытқан. Ал ақпаратты таратпау үшін 1,2 миллион теңге талап еткен.

«Қалалық полиция департаментінің қызметкерлері ірі ақша бопсалады деген күдікпен С. есімді азаматты ұстады. Бұл факті бойынша қылмыстық іс қозғалды. Қажетті тергеу әрекеттері жүргізіліп жатыр»,  деп хабарлады Шымкент полиция департаменті.

Қазіргі таңда күдікті уақытша ұстау изоляторына қамалды. 

Еске сала кетейік, соңғы кезде блогерлердің қарапайым немесе танымал тұлғаларды бопсалауы жиі болып кетті. Соңғы рет 8 наурызда Тараздық блогер әрі «Болашақ плюс KZ» қоғамдық бірлестігінің өкілі Абай Жүндібаев ұсталды деген ақпарат тарады. Облыстық полиция департаментінің экстремизмге қарсы күрес басқармасына спорт кешені директорының 2 500 000 теңге талап ету және бопсалау фактілері анықталды.