Шымкентте колледж студенті ауыр соққыдан қайтыс болды

22 қыркүйекте Шымкенттегі М.Өтебаев атындағы жоғарғы жаңа технологиялар колледжінің жатақханасында 16 жастағы студент қайтыс болды. Ол кеудесі мен иығына тиген соққыдан мерт болған.

Қалалық білім басқармасының мәліметінше, оқиға түнгі сағат 12:30 шамасында колледж жатақханасында болған. 1-курс студенті ауыр соққыдан есін жоғалтқан.

Жедел жәрдем шақырылып, алғашқы медициналық көмек көрсетілгенімен оның өмірін дәрігерлер сақтап қала алмаған.
Полиция студенттің кеудесі мен иығына екі жігіттің ұрғаны жөнінде ақпарат таратты.

Білім басқармасы бұл екі жігіт жөнінде әзірге ақпарат бермеді.
Оқиғаға байланысты Қылмыстық Кодекстің «Денсаулыққа қасақана ауыр зиян келтіру» бабымен (106-бап) қылмыстық іс қозғалған. Тергеу жүріп жатыр.

Марқұм отбасындағы бес баланың екіншісі болған. «Сандық техника» мамандығы бойынша білім алған. Түркістан облысы Түлкібас ауданы Пістелі ауылындағы Ы.Алтынсарин атындағы мектептің 9-сыныбын бітірген.

Автор: Дилара Иса