Шымкентте көз жұмған екі қыздың өліміне не себеп болғаны белгілі болды

Шымкентте бір аптаның ішінде пәтерде екі қыздың жансыз денесі табылған. Жергілікті әкім Мұрат Айтенов бұл жағдайларға қатысты пікір білдірді.

«Өкінішке қарай, екі қыз қайтыс болды. Ата-анасына, туған-туыстарына, жақындарына көңіл айтамын. Бірінші оқиға бойынша қазір жедел-іздестіру шаралары жүргізілуде, бір күдікті ұсталды. Қалалық полиция департаменті жұмыс істеп жатыр» деді әкім Орталық коммуникациялар қызметінде өткен брифингте.

Екінші жағдайда бойжеткен қауіпсіздік ережелерін сақтамау салдарынан көз жұмғаны анықталды.

«Пәтерде өрт шығып, ол көмірқышқыл газына тұншығып қалған» деді әкім.

Еске салсақ, Шымкентте жалдамалы пәтерден қыздың күйген мәйіті табылған. Бұл факті бойынша кінәлі адам ұсталған. Бірақ араға көп уақыт салмай, тағы бір қыздың жансыз денесі жалдамалы пәтерден табылған.