Шымкентте көпбалалы аналар әкімдік алдында түнеді

Шымкентте көпбалалы аналар уақытша баспана беруді талап етуде, деп хабарлады Orda.kz Астана телеарнасына сілтеме жасап.

Олар қойған талаптарына жету үшін наразылық акциясын өткізді. Он шақты әйел, оның ішінде жүкті әйелдер қалалық әкімдіктің босағасында түнеуге шешім қабылдады.

Әйелдердің айтуынша, олардың көпшілігі баспана жалдай алмайды. Ал пәтер алуға кезегі әлі келмеген. Пәтер иелері көпбалалы отбасына баспана бергісі келмейді.

– Көп баламыз болғандықтан бізді ешкім алмайды. Біздің талаптар: тұрғын үй болмағандықтан, мемлекет бізге көмекке шықсын. Тұрғын үй-коммуналдық шаруашылық балансында уақытша тұрғын үй бар. Біз осыны ғана талап етіп отырмыз, - деді Раушан Жанарова, көп балалы ана.

Наразылық білдірушілерден таңертеңге дейін бес әйел әкімдікте қалды. Тәртіп сақшылары оларды тарқатпақшы болды.

Әкімдік қызметкерлерінің айтуынша, көп балалы аналарға уақытша тұрғын үй беру заңмен қарастырылмаған. Пәтерлер кезек бойынша беріледі. Мысалы, биыл оны жиналғандардың ішінде екеуі алады.

– Уақытша баспана тұрғын үй қатынастары туралы заңда қарастырылмаған және біздің заңды бұзуға құқығымыз жоқ, - деді Абылайхан Балықбаев, Шымкент қалалық тұрғын үй бөлімі бастығының орынбасары.

Наразылық білдірушілер уақытша пәтер алуға ниет білдіріп, ел Президентіне хат жазбақ.