Шымкентте кәмелетке толмаған қыздардың тәнін саудалаған жеңгетайлар ұсталды

Шымкентте полицейлер Қызылорда облысынан келген жеңгетайларды құрықтады, олар кәмелетке толмағандарды жезөкшелікпен айналысуға итермелеген.

Polisia.kz ақпаратына сәйкес, «Stop трафик» профилактикалық іс-шарасын өткізу барысында полиция жалдамалы пәтерлердің бірінде жезөкшелікпен айналысатын әйелдерді анықтады. Олардың барлығы Семей, Қарағанды, Тараз, Атырау және Шымкент қалаларының тұрғындары. Олар мән-жайларды анықтау үшін Шымкент қаласы ПД тергеу басқармасына жеткізілді.

Мегаполисте Қызылорда облысынан келген үш әйел жезөкшелікпен айналысу үшін притон ұйымдастырып, оған Қазақстан азаматшаларын тартқаны анықталды. Олардың арасында екі кәмелетке толмаған қыздар бар.

«Үш жеңгетай қамауға алынды. Оларға қатысты ҚР ҚК 308 («жезөкшелікпен айналысуға тарту») және 309 «жезөкшелікпен айналысуға арналған притондар ұйымдастыру немесе ұстау және жеңгетайлық» баптарына сәйкес сотқа дейінгі тергеу жүргізілуде» деп хабарлады ПД.