Шымкентте көлік жүргізушісі апалы-сіңлілі оқушыны қағып кетті

Басқа көлікпен соғысып қалудан қашып, көлік жүргізушісі тротуарға шығып кетіп, апалы-сіңлілі екі оқушыны қағып кетіп, бағанаға барып соғылды.

Otyrar.kz хабарлауынша, қайғылы оқиға 5 мамыр күні таңертең әл-Фараби көшесіндегі алтыншы емхананың алдында болған.

Hyundai көлігінің жүргізушісі басқа көлікпен соқтығысудан аулақ болуға тырысып, рөлге ие бола алмай, тротуарға шығып кеткен.

Осы кезде екі оқушы қыз көше қиылысында бағдаршамның жасыл жануын күтіп тұрған.

Көлік қыздарды қағып, кейін бағанаға соғылған. Бастауыш сынып оқушылары түрлі дене жарақаттарымен «Асар» шағын ауданындағы балалар ауруханасына жатқызылды.

Аталған факті бойынша жол-көлік оқиғасын жасаған жүргізушіге қатысты ҚР ӘҚБтК-нің «Көлiк құралдарын жүргiзушiлердiң кәмелетке толмағандардың дене жарақатына әкеп соқтырған жол жүру ережелерiн бұзуы» бабы бойынша хаттама толтырылды.

Екі көлік те уақытша айып тұрағына қойылды.