Шымкентте үйлерді су тасқынынан  аман алып қалуға тырысуда

Жағасын үнемі су шайып жатқан өзенге жақын  жиырмадан астам үй құлауы мүмкін.

Шымкентте тұрғын үйлердің опырылып құламауы  үшін Бадам өзенінің арнасын өзгертуге әрекеттеніп жатыр. Жағалауда тұрғызылған жиырма шақты үйге қауіп төніп тұр. Көктемгі су тасқынының салдарынан өзен арнасы  кеңейіп, кез келген уақытта апат болуы мүмкін.

Үйлері жағадан бір метрдей ғана қашықтықта тұрған тұрғындар көктем келген сайын алаңдай түседі. Kazpravda.kz сайтына тұрғындар: Мәселе өзен арнасынан қиыршық тасты бақылаусыз қазып алып жатқандардың кесірінен туындап отыр. Ол тұрақты түрде өнеркәсіптік ауқымда жүзеге асырылады, ал заңсыз өндірумен күрес нақты нәтиже бермейді, деген.

Енді тұрғындар апаттың алдын алу  үшін Бадам өзенінің  бағытын өзгертуге тырысады. Бірақ Шымкент қалалық Төтенше жағдайлар департаментінің мамандары өзен арнасының өзгеруін уақытша шара деп отыр. Мәселені шешу үшін өзен арнасын бекіту  жұмыстарын жүргізу қажет.

— Жағдай бақылауда. Әзірге тұрғындарды көшірудің қажеті жоқ. Бірақ бәрібір, күтпеген оқиға болған жағдайда, құтқарушылар қалай әрекет ететіндігі туралы жоспар  әзірленді. 120-шы мектеп базасында жақын маңдағы эвакуациялау пунктін орналастыру туралы шешім қабылданды, - деді Шымкент қалалық Төтенше жағдайлар департаментінің басшысы Мадияр Жақсыбаев.

Оның айтуынша, қазір Бадам арнасы бойында, Ақсай-Қарабастау каналы, 195-орамдағы атауы жоқ канал, Бозарық каналы және Ақжар су қоймасы маңында орналасқан алты қауіпті учаске анықталды. Оның үшеуі аумақтық жағынан Еңбекші және  қаладағы Абай аудандарына жатады.