Шымкентте ғимарат құлап, үш адам қаза болды

Шымкенттегі  «Ордабасы»  индустриалды аймағында бес қабатты ғимарат опырыла құлап, салдарынан үш адам сол жерде қайтыс болды деп хабарлайды Оtyrar.kz.

Қайғылы оқиға туралы хабар ТЖД желісіне  сенбі, 13 ақпан күндіз түскен. Оқиға Еңбекші ауданында Қапал батыр тас жолында орналасқан «Ордабасы»  индустриалды аймағында болды. Төтенше жағдайлар департаментінің мәліметінше, бес қабатты ғимараттың 625 шаршы метрге жуық  темір-бетон плиталарының жабындысы опырылып, құлаған.

Ғимарат бұған дейін қараусыз қалған, оның жалпы ауданы – екі мың шаршы метр болады. Оқиға орнына жедел құтқару жасағы, кинологиялық және апаттар медицинасы орталығының бригадалары келген.

Өкінішке қарай,  кинологтар үйінді астынан үш ер адамның (1967, 1992 және 1999 жылғы туылған азаматтардың) денесін алып шықты. Алдын ала болжам бойынша, олардың бірі күзетші болып жұмыс істеген, қалған екі азамат  иесіз цехтың металл құрылғыларын бұзумен айналысқан.